Gjafakortasala aldrei meiri
Gjafakort í Borgarleikhúsið er afar vinsæl jólagjöf þessi jólin því aldrei hafa fleiri kort selst en nú í desember. Þar með er slegið met leikhússins frá því í fyrra. Þá hafa aldrei selst fleiri kort á einum degi en í gær en þá seldust nær 2500 gjafakort í leikhúsið. 15.000 gjafakort hafa þegar selst í desember. Almenn gjafakort í Borgarleikhúsið eru opin og gilda á sýningu að eigin vali en einnig hafa sérstök gjafakort á Söngvaseið og Gauragang þar sem geisladiskur og bók fylgja með, notið mikillar hylli.
Þessi sprenging í gjafakortasölu leikhússins kemur í kjölfar aðsóknarmesta ársins í sögu Borgarleikhússins en nú í haust hafði áskriftarkortasala tuttugufaldast á rúmu ári.
„Við höfum aldrei upplifað annað eins og gjafakortasöluna fyrir þessi jól og þó hef ég verið hér í leikhúsinu í nær tuttugu ár. Stemningin er einstök enda gestir okkar í sannkölluðu jólaskapi þegar þeir heimsækja okkur hér í miðasölunni. Hér hefur verið röð út úr dyrum alla síðustu viku og því höfum við fjölgað starfsfólki til að anna eftirspurn“, segir Guðrún Stefánsdóttir miðasölustjóri Borgarleikhússins.
