Góðir Íslendingar fá frábæra dóma gagnrýnenda
Þjóðin tilbúin til að hlusta!
Það voru slegnir leikhúsgestir en gríðarlega ánægðir sem stóðu upp úr sætum sínum á Nýja sviðinu á föstudagskvöldið að lokinni frumsýningu á Góðir Íslendingar. Sýningin hitti algerlega í mark og eru gagnrýnendur á einu máli um gæði sýningarinnar og þörf þess að sjá pólitískt leikhús hér á landi. „Þetta er magnaður hópur sem saman getur gert hvað sem vera skal enda er sýningin frábær.“ Segir Silja Aðalsteinsdóttir í TMM og gagnrýnandi Morgunblaðsins gefur verkinu 4 og ½ stjörnu í sínum dóm. Bryndís Schram segir í dóm sínum á pressan.is að þrátt fyrir vonleysið í þjóðfélaginu sem verkið speglar vel þá sé von meðan við eigum svona gott leikhúsfólk sem „ hikar ekki við að stinga á kýlum samtímast og ungir leikarar koma boðskapnum til skila, gagnteknir leikgleði, er ástæðulaust að örvænta. Þá er enn von.“
