Opið hús í Borgarleikhúsinu
Allir starfsmenn Borgarleikhússins voru í gestgjafarhlutverki
Troðfullt var út úr dyrum á opnu húsi og ánægjan skein úr hverju andliti, ungu sem öldnu.
Vel yfir 10.000 manns heimsóttu leikhúsið sitt í gær en viðamikil dagskrá var í boði. Skoðunarferðir leiddu gesti um króka og kima leikhússins. Skoðunarferðir voru á fimmtán mínutna fresti þar sem gengið var í gegnum opnar æfingar á Fólkinu í kjallaranum, Enron, Afanum og Villidýr og Pólítík. Þá var farið í gegnum smíðaverkstæði og búningasafnið.
Þá voru sýnd atriði úr Gauragangi, Harry og Heimi og Horn á höfði svo eitthvað sé nefnt. Skoppa og Skrítla skemmtu krökkunum. Nýdönsk og Sniglabandið spiluðu fyrir alla aldurshópa. Þá voru trúðarnir úr Jesú litla á vappi.
Allir starfsmenn Borgarleikhússins voru í gestgjafarhlutverki og sást m.a. til Hilmis Snæs, Sigga Sigurjóns, Gísla Arnar, Nínu Daggar, Sveppa og Halldórs Gylfasonar taka á móti gestum.
