Benedikt Erlingsson

Benedikt Erlingsson útskrifaðist frá Leiklistarskóla Íslands árið 1994 og lék í Galdra-Loft í Óskinni eftir Jóhann Sigurjónsson haustið eftir. Hann setti upp leikritið Ormstungu, ásamt leikkonunni Halldóru Geirharðsdóttur og sænska leikstjóranum Peter Engkvist. Benedikt leikstýrði Skáldanótt eftir Hallgrím Helgason á Stóra sviði Borgarleikhússins haustið 2000 og haustið eftir lék hann Vladimir í Beðið eftir Godot eftir Samuel Beckett á Nýja sviðinu. Benedikt var leiðtogi leikhópsins á Nýja sviði Borgarleikhússins leikárin 2001/2002 og 2002/2003 og leikstýrði þá verkunum Fyrst er að fæðast eftir Line Knutson, And Björk of course... eftir Þorvald Þorsteinsson og Sumarævintýri - byggt á Vetrarævintýri Shakespeares. Benedikt var búsettur í Kaupmannahöfn um tveggja ára skeið og starfaði þar og víðar á Norðurlöndum. Hann kom heim og leikstýrði Draumleik eftir August Strindberg hjá Borgarleikhúsinu vorið 2005 og fékk Grímuverðlaunin fyrir bestu leikstjórnina það árið. Sýning Benedikts, Mr. Skallagrímsson, sem hann samdi, lék og setti upp í Landnámssetrinu í Borgarnesi var geysivinsæl og hlaut hann Grímuverðlaunin sem leikskáld og leikari ársins 2007 sem og fyrir leikstjórn sína í Ófögru veröld sem sýnd var á Stóra sviði Borgarleikhússins. Benedikt hefur einnig leikið í ófáum kvikmyndum og í sjónvarpi, þar má nefna mynd leikstjórans Lars von Trier, Direktoren for de hele, kvikmyndirnar Mávahlátur og Tár úr steini og sjónvarsþættina Fóstbræður.

Nýlegar sýningar í Borgarleikhúsinu

Jesús litli		Leikstjórn
Elsku barn		Leikarar
Hótel Volkswagen		Leikstjórn