Velkomin í Borgarleikhúsið

Ávarp leikhússtjóra í kynningarriti leikársins 2010-2011

Kæru leikhúsgestir

Það var bjart yfir Borgarleikhúsinu á síðasta leikári þrátt fyrir öldurót í samfélaginu. Íslendingar flykktust í leikhúsið og sóttu sér næringu, kraft og skemmtun. Markmið leikhússins er margþætt, en auk skemmtunar kappkostum við að spyrja krefjandi spurninga og velta upp nýjum flötum.

Þegar Rannsóknarskýrsla Alþingis kom út, réðst Borgarleikhúsið í að lesa skýrsluna upp í heild sinni fyrir þjóðina. Allt starfsfólk leikhússins kom að lestrinum sem stóð samfleytt í 146 klukkustundir. Það var sannarlega ógleymanleg upplifun að hlusta og melta ásamt samborgurum. Um sex þúsund gestir hlýddu á flutninginn og tífalt fleiri fylgdust með beinni útsendingu um allan heim. Þannig leikhús vill Borgarleikhúsið vera, leikhús sem leggur lóð á vogarskálar þjóðfélagsumræðunnar.

Að sjálfsögðu eru það leiksýningarnar sem mest ber á í starfsemi leikhússins. Þar var af nógu að taka og metaðsókn enn á ný er sterkasta vísbendingin um að leikhúsið tali beint til samfélagsins. Við erum afar þakklát fyrir áhuga áhorfenda okkar og einnig fyrir þann fjölda viðurkenninga sem Borgarleikhúsið hlaut þegar Íslensku leiklistarverðlaunin voru afhent í lok leikárs. Þessi meðbyr er hvatning til að sækja fram og gera enn betur.

Það er með stolti sem við kynnum nýtt glæsilegt leikár í meðförum margra fremstu listamanna þjóðarinnar.

Á Stóra sviðinu frumsýnum við í september Enron sem er umtalaðasta leikrit heims síðasta árið. Verkið er afar kraftmikið, grípandi og á sennilega hvergi betur heima en á Íslandi í dag. Um jólin mun einn fremsti leikstjóri heims, Oskaras Koršunovas leikstýra Ofviðrinu. Undirbúningur hefur staðið í tvö ár og leikhúsunnendur geta hlakkað til sannkallaðrar leikhúsveislu. Eftir áramótin kemur drepfyndinn gamanleikur, Nei, ráðherra! Sem fær jafnvel fúllyndustu menn til að gráta af hlátri.

Á Nýja sviðinu frumsýnum við í október nýja leikgerð á verðlaunasögu Auðar Jónsdóttur, Fólkið í kjallaranum. Ögrandi nútímaverk hafa verið áberandi á Nýja sviðinu og í þeim flokki er Elsku barn. Í apríl kemur glæný sýning frá Vesturporti sem nefnist Húsmóðirin. Samstarf Borgarleikhússins og leikhópsins hefur verið afar gjöfult í gegnum árin en uppsetning okkar á Faust verður sýnd í haust í hinu virta Young Vic-leikhúsi í London. Klúbburinn er hópur frábærra listamanna sem ætlar að bræða saman listgreinar í dansleikhússýningu á vormánuðum.

Einn ástsælasti leikari landsins, Sigurður Sigurjónsson, er Afinn í bráðfyndnum einleik á Litla sviðinu sem mun einnig hýsa krassandi ruslóperu, Strýhærði Pétur frá bresku sveitinni The Tiger Lillies. Þar eru áhorfendur leiddir um rýmið í óvenjulegu standandi leikhúsdjammi.

Við bjóðum upp á fjölbreytta dagskrá fyrir fjölskyldur og unga leikhúsgesti á öllum sviðum. Fyrst ber að nefna stórsýninguna Gauragang sem heillaði leikhúsgesti í fyrra og Skoppa og Skrítla koma líka aftur á svið. Barnasýning ársins, Horn á höfði mun kæta gesti Borgarleikhússins í vetur og þá mun Gói opna heim ævintýranna með Eldfærunum. Eftir áramótin hefst undirbúningur fyrir einn vinsælasta fjölskyldusöngleik allra tíma, Galdrakarlinn í Oz. Þá bjóðum við hæfileikaríkum börnum að taka þátt í ævintýrinu með okkur en áhugi barna á þátttöku í starfi leikhússins sannaðist þegar fjögur þúsund börn tóku þátt í áheyrnarprufum fyrir Söngvaseið.

Vegna mikilla vinsælda snúa nokkrar sýningar aftur frá fyrra leikári í takmarkaðan tíma. Jesú litli kom, sá og sigraði því hún bræddi öll hjörtu og var svo valin leiksýning ársins á Grímuhátíðinni í vor. Áhorfendur stóðu á öndinni yfir Fjölskyldunni og Harry og Heimir voru sýndir yfir hundrað sinnum.

Aldrei hafa fleiri átt áskriftarkort í leikhús á Íslandi en síðustu tvö leikár í Borgarleikhúsinu. Sem fyrr bjóðum við kort á frábæru verði og unga fólkið fær þau á sérstökum kostakjörum. Því hvet ég alla til að vera með í vetur og tryggja sér áskrift strax.

Áhorfendur góðir, framundan er gott leikár. Við ætlum okkur að hreyfa við ykkur og ögra. Skemmta ykkur og kæta. Spyrja áleitinna spurninga og skipta máli í lífi Íslendinga.

Nýtt leikár Borgarleikhússins er ferskt, nýmalað og ilmandi.
Verið hjartanlega velkomin!

Magnús Geir Þórðarson,
leikhússtjóri Borgarleikhússins