Færeysk stórstjarna á leið í Borgarleikhúsið
Færeyska stórstjarnan Gunnvá Zachariasen sem glöggir streymisveituneytendur þekkja úr sjónvarpsseríunni Trom sem sýnd er á Viaplay mun stíga á svið í Borgarleikhúsinu í verkinu Þoku sem frumsýnt verður laugardaginn 26. mars.
Þoka er íslensk/færeysk leiksýning fyrir börn sem leikur á mörkum vísinda og þjóðsagna. Sýningin fjallar um náttúrufyrirbrigðið þoku, sem er þegar öllu er á botninn hvolft lítið annað en sveimur örsmárra vatnsdropa, ský sem liggur við jörðu.
Þokuvísindafólkið Hulda og Karlsson eru komin á vettvang með mælitæki sín til að leita ofursjaldgæfrar þoku. Verkefni þeirra reynist þó allt annað en einfalt því margt býr í þokunni og í bland við fræðslu um þetta magnaða veðurfyrirbæri opnast ævintýra- og þjóðsagnaheimur á sviðinu.
Leikarar í sýningunni eru hin fyrrnefnda færeyska Gunnvá Zachariasen og hinn íslenski og mjög svo geðþekki Hilmir Jensson. Skemmtileg, heillandi og fræðandi sýning fyrir þriggja ára og eldri. Leikhópurinn Selur stendur að Þoku í samstarfi við Borgarleikhúsið