Taktu lagið Lóa

Nístandi fyndinn sársauki

Leikritið lýsir á miskunnarlausan en meinfyndinn hátt niðurlægjandi aðstæðum fólks sem hefur orðið undir í þjóðfélaginu. Lóa er feimin og óframfærin ung stúlka sem býr með óreglusamri móður sinni, afskipt og vanrækt.

Hún hefur gripið til þess ráðs að loka sig af í eigin heimi, í félagsskap tónlistarinnar sem er hennar eina haldreipi. Faðir hennar heitinn skildi eftir sig gríðarlegt plötusafn og Lóa hefur smátt og smátt náð ótrúlegri leikni í að herma eftir ýmsum frægum söngkonum. Eitt kvöldið kemur móðir hennar heim með nýjan bólfélaga sem er umboðsmaður þriðja flokks skemmtikrafta og dreymir um skjótfenginn gróða. Hann heyrir Lóu syngja og sér samstundis gróðavon í hæfileikum hennar.

Jim Cartwright var meðal fremstu leikskálda Bretlands og nutu leikrit hans mikilla vinsælda. Verk hans, Stræti, Barpar og Lóa (Taktu lagið Lóa! Í þýðingu Árna Ibsen) hafa öll verið sýnd hér á landi og slógu rækilega í gegn. Nú, 25 árum síðar, snýr Lóa aftur til nýrra áhorfenda í glænýrri þýðingu Braga Valdimars.