Rómeó ❤️ Júlía

Íslenski dansflokkurinn

Dansverk eftir Ernu Ómarsdóttur og Höllu Ólafsdóttur við tónlist Sergeis Prokofievs.

Íslenski dansflokkurinn færir okkur Rómeó ❤️  Júlíu, stórbrotið dansverk Ernu Ómarsdóttur og Höllu Ólafsdóttur í túlkun dansara Íslenska dansflokksins. Um er að ræða frumflutning verksins á Íslandi.

RÓMEÓ ❤️  JÚLÍA var upphaflega skapað í samstarfi við dansara Gärtnerplatz leikhússins í München og frumsýnt árið 2018 en er nú endurskapað í samvinnu við dansara Íslenska dansflokksins. Sígildur harmleikur Shakespeares er rækilega afbyggður og brotinn niður í fjölmargar frásagnir sem gerast samhliða svo úr verður veröld full af lostafullri þrá, líkamsvessum og logandi eldtungum, særingarmætti öskursins og heilandi ást – undir skæru og neonlituðu hjarta. Saman við renna ævintýraleg sviðsmynd og búningar, mögnuð vídeóverk og stórkostleg tónlist Sergeis Prokofievs svo úr verður sýning sem lætur enga ósnortna.