Ferj­an

Fimm íslenskar konur og þrír karlar eru stödd erlendis. Allt þetta fólk á brýnt erindi til Íslands en þar sem flugsamgöngur liggja niðri sökum eldgoss neyðast þau til að sigla heim með ryðguðum dalli sem er í sinni síðustu ferð. Þegar fólkið kemur um borð kemur í ljós að ýmislegt er öðruvísi en búist var við. Konunum er troðið saman í litla káetu á meðan karlmennirnir fá aðstöðu á rúmgóðum bar þar sem þeir spila tónlist og skemmta sér. Eftir nokkrar vangaveltur ákveða konurnar að taka málin í sínar hendur. Óvænt atburðarás er í uppsiglingu.

Kristín Marja Baldursdóttir hefur verið í hópi vinsælustu rithöfunda landsins undanfarna áratugi. Meðal hennar þekktustu og vinsælustu verka eru Karítas án titils, Óreiða á striga, Mávahlátur og Hús úr húsi. Hún er leikskáld Borgarleikhússins og hér er fyrsta leikverk Kristínar á ferðinni.

Kristín Eysteinsdóttir leikstýrir hér einvala liði leikara. Hún er fastráðinn leikstjóri við Borgarleikhúsið og hefur leikstýrt fjölda verka við góðan orðstír, til dæmis Svar við bréfi Helgu og Fólkið í kjallaranum.

Frumsýning 21. mars 2014 á Litla sviði Borgarleikhússins.