Nýtt leik­ár hefst í Borg­ar­leik­hús­inu

Við hlökkum til að sjá ykkur í Borgarleikhúsinu

Kæru leikhúsgestir,

Nú er Borgarleikhúsið að fyllast af lífi á ný eftir sumarfrí. Æfingar eru hafnar, sviðin að vakna og það styttist í að við opnum dyrnar og bjóðum ykkur velkomin á nýtt leikár.

Við erum full tilhlökkunar enda verður veislan stór í vetur. Á hlaðborði leikársins verða fjölbreyttar sýningar fyrir alla aldurshópa og ólíkan smekk: spennuþrungnar og mannlegar sögur, hjartnæm verk, stórir söngleikir, fjölskylduævintýri, gaman, ópera, sirkus og margt fleira.

Yfir fimmtán sýningar verða á fjölum Borgarleikhússins í vetur. Ný íslensk verk og sígildar sögur fá að njóta sín, nýjar sýningar líta dagsins ljós og vinsælar sýningar frá síðasta leikári snúa aftur.

Leikhúsið er staður þar sem við komum saman, hlæjum, hrífumst, undrumst og sjáum heiminn frá nýju sjónarhorni. Við vonum að öll finni eitthvað við sitt hæfi á fjölbreyttri dagskrá vetrarins.

Nú er allt að verða tilbúið, ljósin að kvikna og tjaldið að rísa.

Við hlökkum til að sjá ykkur í Borgarleikhúsinu í vetur!

Egill Heiðar Anton Pálsson
Borgarleikhússtjóri