Svika­sög­ur frum­sýnd­ar

Svikasögur, glænýtt verk eftir Maríu Reyndal, verður frumsýnt á Stóra sviði Borgarleikhússins laugardaginn 19. september kl. 20.

Svikasögur er nýtt íslenskt verk eftir Maríu Reyndal, sem jafnframt leikstýrir sýningunni. Verkið er það þriðja sem hún setur upp í Borgarleikhúsinu en áður hefur hún sett upp Er ég mamma mín? og Með Guð í vasanum.

Í þessum verkum hefur María unnið með fjölskylduna, náin tengsl og því sem gerist þegar eitthvað fer úr skorðum. Í Svikasögum beinir hún sjónum að hjónaskilnaði og rofi í kjarnafjölskyldunni og segir söguna með húmor og hlýju.

Í Svikasögum gefur María áhorfendum innsýn í líf unglingsstúlku á níunda áratugnum. Inn í fjölskyldusöguna fléttast ættboginn allur, besta vinkonan í næsta húsi, rottugangur, túrbankellingar, óperusöngur og níundi áratugurinn í allri sinni dýrð.

María leiðir saman öflugan leikhóp í Svikasögum: Berglindi Öldu Ástþórsdóttur, Rebeccu Lív Biraghi, Viktoríu Dalitso Þráinsdóttur, Birnu Pétursdóttur, Hákon Jóhannesson, Mikael Kaaber, Kötlu Margréti Þorgeirsdóttur og Vilhelm Neto.

María er einnig þekkt fyrir störf sín á skjánum. Hún er einn höfunda gamanþáttanna Stelpnanna, skrifaði og leikstýrði Mannasiðum, var einn handritshöfunda Ástríðar og einn leikstjóra Verbúðarinnar.