Vel heppn­uð frum­sýn­ing á Sýslu­manni Dauð­ans

Fyrsta frumsýning vetrarins var laugardaginn 21. september þegar Sýslumaður Dauðans var frumsýndur fyrir fullu húsi við mikinn fögnuð áhorfenda.

Sýslumaður Dauðans er nýr drama-gamanleikur eftir Birni Jón Sigurðsson, og er í senn fyndinn, hjartnæmur og uppfullur af sköpunargleði. Verkið er skapað inn í íslenskan veruleika og fjallar um Ævar Birkisson sem missir föður sinn, Birki Ævarsson. Á útfararstofu Orfeusar fær hann tilboð sem hann getur ekki hafnað og upphefst þar með Kafkaískur leiðangur hans í leit að föður sínum.

Leikstjórn er í höndum Stefáns Jónssonar, með hlutverk Ævars fer Haraldur Ari Stefánsson en föður hans Pálmi Gestsson, sem stígur í fyrsta sinn á svið í Borgarleikhúsinu. Aðrir leikarar eru Sólveig Arnarsdóttir, Birna Pétursdóttir og Hákon Jóhannesson. Leikmyndina hannaði Mirek Kaczmarek og tónlistina samdi Ásgeir Trausti.