Yfir 1.300 börn á Kjar­val!

Undanfarnar vikur höfum við tekið á móti yfir 1.300 börnum í fimmta bekk í grunnskólum Reykjavíkurborgar á Kjarval, undurfagurt og skemmtilegt verk um þennan dáða listamann.

Í dag fengum við síðasta hóp leikársins í heimsókn þegar börn úr Klettaskóla komu á afslappaða sýningu.

Á afslöppuðum sýningum eru ljós í áhorfendasal dempuð í stað þess að vera slökkt, dyr eru opnar á meðan sýningu stendur og í forsal er boðið upp á skynrými, sem er afdrep þar sem hægt er að fá hvíld frá áreiti.

Leikhópurinn leggur nú af stað í leikferð austur á land þar sem Kjarval verður sýndur í Sviðslistamiðstöð Austurlands fyrir börn í Múlaþingi og Fjarðabyggð.