Árni Tryggvason látinn
Árni Tryggvason, einn ástsælasti leikari og skemmtikraftur þjóðarinnar, er látinn, 99 ára að aldri. Árni fæddist á bænum Syðri-Vík í Árskógsstrandarhreppi þann 19. janúar 1924, en ólst upp frá þriggja ára aldri í Hrísey.
Árni gekk í Alþýðuskólann á
Laugum, þar sem hann tók þátt í að semja og leika í revíum, áður en hann fékk
inni í leiklistarskóla Lárusar Pálssonar. Stærstan hluta síns leikaraferils var
Árni fastráðinn við Þjóðleikhúsið, en feril sinn hóf hann hjá Leikfélagi
Reykjavíkur 1947 og lék tæplega 40 hlutverk í Iðnó fram til 1961. Meðal
minnistæðustu hlutverka Árna hjá Leikfélagi Reykjavíkur má nefna Assessor Svale
í Ævintýri á gönguför (1952), Fancourt Babberley í Frænku Charleys
(1954), leigubílstjórann Gunnar Hámundarson í Deleríum búbónis (1959) og síðast
en ekki síst Estragon í Beðið eftir Godot (1960). Árni sneri aftur til
Leikfélags Reykjavíkur um síðustu aldamót og lék séra Jón Prímus í Kristnihaldi
undir Jökli (2001) og Þránd í Fló á skinni (2008). Að loknum 60 ára
farsælum leikferli var Árni sæmdur heiðursverðlaunum Grímunnar árið 2010.
Starfsfólk
Borgarleikhússins sendir aðstandendum dýpstu samúðarkveðjur. Blessuð sé minning
þessa merka listamanns.