Frumsýning á Svartþresti
Svartþröstur, í leikstjórn Vignis Rafns Valþórssonar, verður frumsýndur 21. apríl næstkomandi. Með aðalhlutverk fara Ásthildur Úa Sigurðardóttir og Valur Freyr Einarsson.
Svartþröstur er átakanlegt og áleitið verk eftir eitt fremsta leikskáld Skota síðustu áratuga.
Skrifstofumaður á miðjum aldri fær heimsókn frá ungri konu, sem leitar eftir uppgjöri vegna sambands þeirra mörgum árum áður. Hann á að baki fangelsisdóm, hefur hafið nýtt líf undir nýju nafni og tilviljun ein gerir það að verkum að konan hefur uppi á honum. Bæði eru þau þjökuð af fortíðinni sem hefur markað djúp spor í tilvist þeirra. Hún hefur setið föst í sömu sporum í fimmtán ár á meðan hann hefur reynt að byrja upp á nýtt, en þegar hún birtist er ljóst að hið liðna verður ekki flúið.