Uppselt á Níu líf - og ekkert lát á eftirspurn!
Uppselt er á allar sýningar af Níu lífum. Nýlega var tilkynnt um síðustu sýningar á Níu lífum eftir fjögurra ára sigurgöngu söngleiksins. Í framhaldinu seldist upp á síðustu sýningarnar og er ekki einn miði laus, en lokasýning er 12. janúar 2024.
Níu líf hefur gengið fyrir
fullu húsi allt frá frumsýningu í mars 2020 og fjölmörg dæmi eru um að gestir
komi aftur og aftur. Vinsældir sýningarinnar eiga sér enga hliðstæðu hér á
landi og hefur hún slegið öll aðsóknarmet, en alls hafa 117.450 manns séð sýninguna.
Um helgina seldist upp á lokasýningarnar og hefur leikhúsið vart haft undan að svara fyrirspurnum um mögulegar aukasýningar og miða á þær sýningar sem eftir eru. Borgarleikhúsið hefur aldrei upplifað neitt þessu líkt og þakkar gestum innilega sýndan áhuga.