Yfir 11.000 manns búin að tryggja sér miða á Þeg­ar Trölli stal jól­un­um!

Forsala á fjölskyldusöngleikinn Þegar Trölli stal jólunum fór fram í síðustu viku og sló hún öll fyrri met í Borgarleikhúsinu. Rúmlega 11.000 manns hafa tryggt sér miða á sýninguna, en það samsvarar um tuttugu uppseldum sýningum!

Ljóst er að mikill spenningur er fyrir þessu sígilda jólaævintýri, sem verður frumsýnt í byrjun nóvember næstkomandi á Stóra sviðinu. Um er að ræða stórsýningu með grípandi lögum, töfrandi sjónrænni upplifun og frábærum leikarahópi.

Þegar Trölli stal jólunum verður aðeins sýnd í takmarkaðan tíma yfir hátíðarnar og eru því líkur á að færri muni komast að en vilja.

„Þessar viðtökur eru með miklum ólíkindum og langt umfram það sem ég átti von á,” segir Valur Freyr Einarsson, leikstjóri söngleiksins. „Mér fannst það mikil bjartsýni af leikhúsinu að setja jólasöngleik í forsölu að vori, fólk væri að hugsa um vorverkin í garðinum og dusta rykið af grillinu á þessum árstíma. En ég hafði sannarlega rangt fyrir mér, það er greinilega mikil stemmning fyrir Trölla og við lofum skemmtilegri og töfrandi jólasýningu fyrir alla fjölskylduna!”

Æfingar fyrir söngleikinn hefjast í maí og við getum ekki beðið eftir að bjóða leikhúsgesti velkomna á þessa hlýju og heillandi sögu sem mun stækka hjörtu allra.

Hér er hægt að tryggja sér miða á Þegar Trölli stal jólunum.