Allt sem er frábært

Gleðileikur um depurð

Allt sem er frábært fær fólk til að hlæja þar til það skilur loks hvers vegna það grætur! Hvernig bregst ung dóttir við myrkum hugsunum móður sinnar? Hún býr auðvitað til lista yfir allt sem er frábært í heiminum og gerir lífið þess virði að lifa því: Tuttugu árum síðar er listi ungu stúlkunnar í fullu gildi og hefur lengst svo um munar - í ævilanga áminningu um það að gleði er ekki síst að finna í hlutum sem virðast léttvægir. 

Vala Kristín Eiríksdóttir stendur ein á sviðinu í hlutverki manneskju sem gerir atlögu að depurðinni og lífsleiðanum, með aðstoð áhorfenda og listann góða að vopni, og segir í leiðinni hrífandi sögu af ást, sorg og ís með dýfu. Höfundur er Duncan Macmillan, sá hinn sami og skrifaði verkin Andaðu og Fólk, staðir og hlutir sem sló í gegn í Borgarleikhúsinu fyrir nokkru síðan. Þetta einfalda en snjalla verk hefur verið sett á svið víða um heim og hlotið gríðarlega góðar viðtökur gagnrýnenda jafnt sem áhorfenda og birtist hér í þýðingu Kristínar Eiríksdóttur.