Hvíta tígrisdýrið fær frábæra dóma
Hvíta tígrisdýrið, sem frumsýnt var í Borgarleikhúsinu 7. janúar síðastliðinn, hefur fengið frábæra dóma frá gagnrýnendum!
Hvíta tígrisdýrið er dularfullt ævintýraverk um þrjú börn sem finna óvænt hugrekki til að mæta hættum sem leynast í skuggunum. Leikhópurinn Slembilukka setur upp verkið í samstarfi við Borgarleikhúsið. Með hlutverk í sýningunni fara Guðlaug Elísabet Ólafsdóttir, Jökull Smári Jakobsson, Laufey Haraldsdóttir og Þuríður Blær Jóhannsdóttir. Verkinu er leikstýrt af Guðmundi Felixsyni og höfundur er Bryndís Ósk Þ. Ingvarsdóttir.
Sýningin hefur fengið frábæra dóma gagnrýnenda og er m.a. lýst svo af Sigríði Jónsdóttur, gagnrýnanda Fréttablaðsins: „Sviðslistahópurinn Slembilukka er svo sannarlega að stimpla sig inn í sviðslistasenuna og gaman að sjá Borgarleikhúsið standa við bakið á honum. Hvíta tígrisdýrið er öðruvísi barnasýning en áður hefur sést á íslensku leiksviði. Fátt er dregið undan hvað varðar efnistök en stutt er í leikhústöfrana og sýningin ber að lokum með sér skilaboð um manngæsku og fyrirgefningu, bráðnauðsynlega lexíu fyrir leikhúsáhorfendur á öllum aldri.“
Þá fékk sýningin fjórar stjörnur hjá Silju Björk Huldudóttur hjá Morgunblaðinu og að sögn Nínu Hjálmarsdóttur hjá Víðsjá er Hvíta tígrisdýrið „Margslungið og dásamlegt verk sem listunnendur ættu ekki að láta framhjá sér fara.“